« Simu ingrandati inseme,cum’è matina è sole.Induve c’era eiu,ci eri tù ».
Eccu parolle di canzona chì li cunvenianu à l’incantu à
Andria è
Petru. Eranu di u stessu paese,ancu di u stessu paisolu. Un paisolu chjuculettu in cima di a
Vulpaiola chì strapiumbava a valle verdicante è scupria e muntagne di a Castagniccia,u Sant’Anghjulu,a bocca di Sant’Antone è u San Petrone. E so case eranu à tocca à tocca è l’usci s’aprianu
nant’à a listessa piazzetta. Una piazzetta cum’è ci n’hè tantu ind’è noi, ò cum’è ci n’eranu tantu chì oghje a ghjelusia è l’egoisimu taglianu à fette sti lochi di memoria. A chì mettendu un
picculu muru di mattoni senza ne gustu ne rispettu, à chì sciacchendu un
grillage cù i canni smizati è appiccicati per piattassi di u sguardu di l’altru, un vicinu, un anzianu amicu o forse ancu un cuginu à quale ùn si face mancu più
mottu.
Eranu case alte è fiere, fatte à petre secche tempi fà da un arcibabbò ò puru un vechju cuginu. Eranu belle ‘sse case tandu, quand’elli eranu zitelli. Arritte è altiere nant’à i sciappali, sfidendu
u tempu, cù i tetti di teghje chì luccicavanu d’estate, dopu e prime acquate di a Santa Maria sott’à i ragi di un sole tornu ardente. Nunda ùn venia à imbruttà e so facciate sputiche, nisun
scialbatu, nisun appicciu di mattoni grisgi chì insultavanu u gustu è i strazi di l’ antenati. Nimu si permettia mancu di rimpiazzà e teghje sacrate da teguli rossi cum’è u sangue chì corre d’una
ferita, quella di ‘ssi paisoli sfigurati cù u seculu novu. Case simplice, à spessu chjuche ma case chì t’avianu un anima, chì tenianu sempre ind’è u so core i ricordi è a vita sgubbata di quelli di
i tempi landani. Case chì respiravanu a mudestia, à spartera, a sulidarità di un tempu chì ùn hè più…(quì vecu ghjà e faccie dilluse di i scarsi lettori chì si dicenu :
« avà ci pare di stà à
sente un discorsu di Ghjuvan Francescu Bernardini »)
Nant’à a piazzetta si gudia l’aria frescu e serate d’estate. Sottu à u celu stellatu è spurgulatu, i vechji s’arripusavanu biendu u caffè, u tè ò ghjucavanu à china. I zitelli giravanu e strette di
u paisolu, senza pudè francà a croce vechja è si cunturravanu à mezanotte .Per una stundarella in più, avianu a permissione di stassine cù l’anziani, ma quant’è li facia cacà di stà à sente e
riturnelle di quellu chì tirava i numari . A matina à bon’ora, à l’aggrottu di u sole sottu à qualchì
pergola, s’aspittava u panatteru, quellu di i ligumi ò u macellaru. Tutti cullavanu trumbittendu da u paese inghjò, chjamendu a ghjente à adduniscesi per
aspittali in cima di a strada, à l’entre di u paisolu. Per u più, era u trostu di u panatteru chì svegliava à
Petru è
Andria. Ma di matinata ùn si vidianu guasi
mai, aspittavanu chì e so mamme li purtessinu u pane è i croissants ; aspittavanu dinù u ghjurnale quand’elli eranu ghjà appena più grandi.
C’era un locu nant’à sta piazzetta chì li piacia assai quand’elli erani abbastanza chjuchi. Un locu induve elli passavanu ore sane à ghjucà, soli ò cù d’altri zitelli. Era un vechju pentone nant’à
qualessu i vicini avianu custruitu un scalone è una terrazza cuperta di teghje ; un vechju pentone cù decine di picculi taffoni, picculi piani è altri scalelli zuccati ind’è a petra. Ghjè quì
ch’elli ghjucavanu cù i so suldatelli ; suldati di piombu prima eppo dopu suldati novi framenti chì parianu da veru omi cù i so panni sfarenti, i so fucili, e so pistole è e so facciaccie gattive.
Ghjucavanu à guerra. Una squadra di suldati, i più bravi di sicuru, s’eranu impustati nant’à e creste ,difindianu i so lochi contru à i nemichi, i più gattvivi,chì vulianu cullà è metteli fora da e
so muntagne. Sti gattivi suldati si piattavanu in qualchì sapara, surtianu à trunchera di collu,pruvavanu à avanzà versu e sarre, è culpiti da u piombu, cascavanu, cascavanu, si sfracicavanu u capu
nant’à i scogli arrutati è venianu à more nant’à a piazzetta. Oghje stu locu ùn hè cambiatu ma più nisun zitellu ùn ci vene à ghjucà. E furmicule cuntinueghjanu u so pass’è vene senza risicà più di
pigliassi qualchì suldatellu nant’à u capu.
Andria è
Petru avianu battutu inseme tutti i lochi di u paese. U catramu di a strada, e tighjate di e strette induve elli girandulavanu da a matina à a sera, in
cerca di qualchì zitella. L’orti maravigliosi chì piattavanu tanti tresori, induve certe volte lasciavanu schiattà a so ira contru à a sucietà di i maiò. L’alivetu vicinu induve elli passavanu
ghjurnate sane, à piattassi ind’è qualchì barracò ò girendu cù e so bissiclette. I chjassi petricosi chì cullavanu sinu à u mulinu, u castagnetu ,u fiumicellu induv’elli amparavanu à piscà. U
stadiu più luntanu, locu di tante rise è di tante imbarrufate. Tanti lochi è tanti ricordi di zitellina ò di ghjuventù, da a prima scialbata a bissicletta sinu à u primu basgiu,bà l’appiattu nant’à
qualchì ponte. Eranu sempre di cumbriccula, cum’è dui picci è mai nimu avia pussutu spiccali, mancu e più belle zitelle di u cantone ch’elli avianu chjappu ind’è e so rete di sguaiuffi
dunnaghji.
Da a piazzetta partia un chjassitellu. Quì c’era tandu un vechju fornu oghje arruvinatu induve a ghjente lampa tutte e so mulizze. Appena più luntanu ci era un locu maravigliosu per quellu chì ci
stava à pusà. Una muraglietta poca alta è un vechju purtone di legnu circundavanu un picculu spaziu,cù u viotu à manu manca. I vechji ci avianu postu belli fiori à diritta è a manca. In fondu di
stu locu si truvava una vergine Maria,à l’agrottu ind’una piccula custruzzione . L’avianu posta quì, prutetta da un purtellu ma mai ùn avarianu pinsatu chì qualchì ad unu averebbe vulsutu male à a
vechja statula. A tighjata per ghjunghje sinu à a statula era originale, stunente. I vechji avianu ficcatu cunchiglie di tutte e mamme ind’un scialbu biancu ;dissegnavanu una musaica culurita chì
accumpagnava i passi di quelli chì venianu à pregà ò puru à arripusassi, guardendu i paisoli à l’inghjò sott’à l’ochji pruttetori di San Martinu. Andria è Petru ci passavanu ore sane à fighjulà e
stelle ;chjachjarendu tra di elli ò purtendu qualchì zitella, più tarde ,ind’è a so trappula prediletta.
Eranu ingrandati inseme è ùn hè chè dopu à u bascigliè chì l’amichi si sò spiccati :
Andria era partutu à studià u dirittu in Nizza.
Petru era più tranchju, si ne
era statu una stonda in paese, senza ne studià ne travaglià ; a ghjente dicia chì l’affare ùn era cusi bè è ch’ellu puderebbe cascà ind’è qualchì trappula. Ma
Petru ùn era di
quelli à circà una vita agitata ; vulia solu
gode a so pace in paese. Passava assai tempu in muntagna, à spassighjà, piscà ò puru à coglie e castagne è i funghi di vaghjime. Facia e legne per l’inguernu dinù
è punia u so urticellu quand’ella venia a bella stagione. Ma à capu à dui anni si n’era avvistu chì li ci vulia à buscà un impiegu s’ellu vulia lascià a casa di i parenti per pudè campà cù a so
fidanzata. In u mentre,
Andria in Nizza avia tralasciatu in furia i banchi di a facultà di dirittu è s’era fattu assai assai amichi. Parlavanu di u paese è di ciò ch’ellu ci vulia
à fà per salvallu. D’una parte c’eranu l’amichi idealisti, chì si vulianu impegnà per una causa ghjusta è degna ,a salvezza di u Populu Corsu è a so terra. Di l’altra parte c’eranu i sguaiuffi chì
riflettianu à a manera a più fàciule per empiesi e stacche, qualessa sia a manera. Ma i Corsi di Nizza, qualesse fussinu e so idee eranu tutti à buleghju, tutti amichi è era ancu diventatu
difficiule di capì ciò ch’unu ò l’altru pinsava ò vulia in fine di contu.Tandu,l’affare andavanu assai prestu di male in peghju. I Corsi di Nizza avianu cuminciatu à piglià qualchì cabulò ò boatta
di notte cù ghjente strana di u locu . Facianu i so affari cù tippi gattivi è viulenti, assai periculosi. Fraquintavanu i lochi i più bughjicosi è tutti i vituperati di a creazione. Un ghjornu hè
schiattata una guerra tra a ghjentaccia di a Cote d’Azur è à i Corsi, più nimu lii vulia bè. Si facianu attaccà da tutte e parte è parechji di quelli più ò menu cunnisciuti è rispettati tandu
avianu avutu da scappà,ancu i più ghjovanni.
Quand’ellu era vultatu in paese
Andria, era diventatu una bestia carc’à odiu. Ghjà i Francesi ùn li pudia pate, ma cù sta sturiaccia di Nizza ùn campava più chè cù a brama di
vindicassi contru à tutti i cuntinentali. Cù
Petru ùn si parlava più dipoi parechji mesi, eranu natu ancu l’astiu da parte di
Andria. Bisogn’à sapè chì
Petru era intrutu ind’è a pulizza per assicurà u so stantapane, si vulia marità è accasà. Per Andria era una vergogna ! I so amichi facianu u so travagliu sottu voce per fà cresce
a tensione. I dui ùn si salutavanu più, ùn si facianu mancu più mottu quand’elli s’infattavanu nant’à a piazzetta. Ognunu circava di schizà u sguardu di l’altru fighjendu i so pedi ò parlendu cù un
altru paisanu. Avianu pruvatu à appacià e cose i so parenti ma ùn c’era manera ;
Andria era troppu schizzinosu è
Petru troppu fieru per fà u primu passu è accettà
e parullaccie ch’ellu avia lintatu u so anzianu amicu. Ognunu facia dunque a so vita senza più primurassi di l’altru. Mentre
Petru travagliava per fassi dui soldi,
Andria battia i lochi i più foschi di l’isula. Cù i so amichi eranu diventati una squadra cunnisciuta chì inspirava u timore ind’è u cantone sanu è al di là, sin’à e fruntiere
ch’elli ùn duvianu francà per
gode a so pace è a so praputenza. A quandu facianu saltà a casa di qualchì pinzutu per a lotta, cù l’idea di fà à prò di a Corsica ; à quandu travagliavanu per
elli stessi : facianu i so affari. Eranu cascati ind’è una trappula senza mancu avvedesine è nimu sapia più qualessu era u so scopu, ma nimu si mittia in traversu chì tutt’ognunu sapia chì a
squadra era oramai capace di tuttu per fassi rispettà.
Eranu ancu surtiti di u suminatu u mese scorsu : avianu fattu corre u sangue per a prima volta dipoi ch’elli eranu vultatu in paese. Un cummerciante ch’avia vulsutu resistà, chì ùn vulia micca pagà
a so parte. L’avianu dettu d’ùn fà micca u scemu, l’avianu dettu di fà cum’è l’altri per tene a so securità ; "
patti chjari,amichi cari " ch’elli dicianu cù un tonu guasi fraternu. Ma u
vechju ùn vulia ascultà, era un omu rozu ch’avia sgubbatu tutta a so vita è chì ùn pudia capì ciò ch’elli li dumandavanu. Un pudia capì perchè sti ghjovanni chì vultavanu da Francia vulianu fà a so
lege ind’è ellu ! Una sera,u vechju avia pigliatu u so fucile è l’avia aspittati u ghjornu ch’elli cullavanu à piglià i soldi ; avia sparatu u primu, di rabbia, ma a squadra l’avia tombu
quantunque. Prima avianu rispostu per difendesi, per salvà i so ossi , ma dopu, videndu u vichjettu vultuliendusi ind’è u so sangue è briunendu, ghjastimendu contrà i vituparati ch’elli eranu
diventati, eranu surtiti di capu. Unu l’avia compiu in terra d’una palla in pienu tupezzu è l’avia pigliatu dopu à calci in bocca da falli guasi schiattà a faccia. Pierrick era u più sanguinosu di
u gruppu, è per i so amichi era diventatu u più curagiosu di sicuru; s’impunia avà cum’è u capimachja di a banda. Dopu à sta passata ch’avia spavintatu a Corsica sana, eranu assitati di sangue, di
soldi è putere è si vulianu misurà à e squadre e più putente di u dipartimentu, quelle chì stavanu in Bastia ò in Casinca.
L’affare ùn eranu più listessi . Ci vulia à scumbatte contru à prufissiunali di i malfatti. Ci vulia à organizassi, à circà d’allargà appena u chjerchju di manera à pudè surprende u nemicu in un
milampu è piglià i so tarritori. Sta sera eranu una decina ind’è
Andria à u cantu di u focu. Ci vulia à mette in ballu una strategia infernale da minà un colpu tremendu in Casinca,
da fà capì subitu à tutti l’altri chì era megliu di sorteli di tra li pedi. Una decina chì pigliava quantunque u tempu di fassi un apperitivu, di fassi arrustì dui figatelli è stuppà duie buttiglie
di sciampagnu. Cù l’alcolu crescia in ogni cumbattante u sintimu di putenza, l’idea chì nimu pudia più resistà à l’assalti di a
squadra di u Golu ; ghjè cusi ch’elli l’avianu chjamati i
media dopu à a strage di Ponte à a Leccia. E si viutavanu e buttiglie, è ridianu, è tuccavanu à l’avvene chì li surridia pinsendu à quelli chì straziavanu cum’è conni per vince dui soldi è curà a
so famigliaccia di merda ! Elli eranu lupi, l’animali i più crudeli è i più putenti di u rughjone. Mentre
Andria scucinava una cria, accunciendu qualchì ligumu per accumpagnà a
salameria è e coste arrustite ; Antò a si fumava nant’à a l’usciu di a casa,vicinu à a piazzetta. A manu à manu vidi una vittura di pulizza chì spuntò è si cansò à dui passi. Chjamò subitu Pierrick
chì s’affaccò in furia . L’altri eranu sempre attavulinati è ùn avianu intesu nunda, ridianu è ciarlavanu ind’è un trostu spavintevule. A mumentu, i stridi d’un omu intrunonu u paisolu. U corciu di
Petru chì si ne vultava in casa soia s’era liccatu una crussata in capu è Pierrick u mantenia in terra,cù u taccu di a so mandle chì li cumprimava u pettu.
L’altri surtianu anch’elli è
Andria tralasciava a cucina per capità l’ultimu annant’à a piazzetta.Vidia u so anzianu amicu in una gattiva situazione : era stracquatu nant’à a
tighjata ,u capu insanguinatu cù tutti l’altri chì u si pigliavanu à calci, ghjastimendu è minacciendu di tumballu. Cridianu ch’ellu era cullatu apposta in paese per seguitalli è chjappanne unu.
Vidia dinù a so moglia chì pienghjia è mughjava da a so finestra . Ad un trattu i vechji ricordi rivensinu à gallu : i ghjochi nant’à a piazzetta induve Petru mughjava di dulore, e spassighjate, e
prime sborgne è e prime zitelette ch’elli dunnighjavanu inseme.
Andria ripigliava cuscenza di ciò ch’ellu era tandu, è di ciò ch’ellu era diventatu. Era avà ora per ellu di sorte
di stu gattivu sonniu è di vultà nant’à a strada diritta, quellu chì u corciu di babbu l’avia insegnatu nanzu di more. Un ascultò più chè u so curagiu è pruvò di salvà u so amicu. S’avanzava à mezu
à l’altri boi chì eranu inghjacariti è pruvava di falli piantà,spiechenduli chì l’omu pistatu di colpi era u so amicu,ch’ellu vulia solu vultà à ritruvà a so moglia in casa. Ma u sangue chì curria
è i mughji di u curciarellu l’esaltavanu ancu di più è ùn ascultavanu mancu u so ospitu. Missi à briunà cum’è un dannatu è s’avviò versu Pierrick à l’affuria per catapussallu ma si liccò anch’ellu
un colpu di ceppu daretu à u tupezzu. A pena era tremenda è u sangue li falava ghjà in u spinu ma ùn pudia faltà avà. Un cascava micca è si tinia rittu contru à un vechju pentone, pruvendu di
ripiglià fiatu per aiutà u so amicu chì era sfracllatu da i colpi chì l’assaltavanu. Feci per piglià a so pistola ma ùn ebbe u tempu : in un milampu è per sola risposta Pierrick missi una palla in
capu à
Petru.
Andria firmò stantaratu da u terrore è l’addisperu ; l’ochji persi, ghjambi è mani trimulenti, ùn si pudia più move . Un era ne un assassinu fretu ne
un eroe, solu un zitellacciu chì s’era lasciatu intrappulà è chì ùn ammaistrava più u so destinu . Pierrick si vultò, u fighjulò in ochji è chjamendulu di traditore cù una voce spietata, li missi
una cartucciata in pettu. Ind’è un’ultimu riflessu di vita ,
Andria volse scappà ma culpitu da una siconda sparata partia in daretu, cascava ,si sfracicava u capu nant’à i scogli
arrutati è venia à more nant’à a piazzetta…
Ultimi cummenti.