L'alta Mossa (G.M.WEBER)

Sentu l'abaghji arghjintini
D'u me ghjacaru Lioni
È li passi cignalini
Sfracichendu lu machjoni
Ancu la mort'è la scoppa
La muchjetta è li puddoni

S'avvicina l'animali
Cerca di fughja a so morti
Ind'a so corsa u cignali
Voli cambià la so sorti
Ma nant'à lu so passaghju
Si sò sarrati li porti

Risentu la so prisenza
Possu senta u so rispiru
Vicina hè la so partenza
Finitu hè lu so righjiru
Hè stanciata a so fughjita
In quistu mondu, a so vita

Eccu, d'un colpu sicuru
Li schiattu lu carbusginu
Nant'à lu pilami scuru
Corri lu rossu sanguinu
Leccu cun affizzioni
Da u me caru Lioni

Lu silenziu si rifaci
Nudda sarà accadutu ?
Tutta a natura si taci
L'angoscia n'hè u pruduttu
Si spigni trà Bè è Mali
L'anima di l'animali

Tandu pà a so salvezza
Mi ni cascu ind'a prighera
Chjamu u bruttu è a purezza
Ciò chì sarà, ciò chì era
Chjamu a petra di i Sarri
L'aria, lu focu è lu mari

Mi veni un gran frettu à dossu
È m'hè datu lu signali
Mi lasciu, in paci ind'u fossu,
Lu cunnisciutu cignali
Tandu u visu d'a luna tonda
Arrussisci u spechju d'onda

Lu me cumpagnu sparisci
Ind'u bughju di a nuttaccia
Francu morti, tanchi è spisci
Com'è ogni volta à la caccia
Mi trova u dì ch'apparisci
Tuttu mugatu di faccia

O trè ghjorni, o trè simani,
Ùn si sà quand'hè la chjama
Visticaraghju ori sani,
Rispundaraghju senza brama
Cù lu me Lioni à fiancu
Bocchineru è pettibiancu.