Quelli di u Foru Corsu
Mi piacenu e to rime o Petra Ghjù,
Perchè sò fatte incù u naturale,
À mè hè quessa chì mi piace u più.
A musa di l’Erbaghju sparghje l’ale,
Ci dice e so brame è e so speme
È e manda versu a capitale.
Quand’ellu pensa à quelle « nere gemme »,
Si face frolla ancu a luntananza
È li si pare d’esse sempre inseme…
È Sò chì maladisce a spiccanza,
Pinsendu notte ghjornu à u so fiore,
Piegne è suspira sola in la so stanza.
Ancu assai chì ci hè l’urdinatore
Per scrive ogni tantu un mazzulellu
Di rime indirizzate à u s’amore.
Hè puetu dinù u Pasturellu,
Nobuli sintimenti porta in senu
È di u foru hè u nostru giuvellu !
L’AMICU IVIU SI DA DI RIMENU,
IN MAIUSCULE SCRIVE OGNI MISSAGIU,
ATTENTI CHI IN CODA CI HA U VILENU !
Bisugnarà dinù à rende umagiu
À quellu nuvellu stuzzicaghjolu,
Ete capitu parlu di Sanbiasgiu.
Di Falasorma è dinù di Niolu,
Unu chì sin’à oghje stava mutu
Hà scrittu duie rime à so modu…
Per telefonu ’ci chì hà chersu aiutu
À un so parintellu niulincu
È cusì à scrive hè riisciutu…
Dunque benvinutu o Falasurmincu !
Tù chì stai trà Guegnu è L’Argintella
Sè muntagnolu è sè dinù piaghjincu !
A mio musa hè trista è urfanella,
Mi manca u mio amicu Ghjuvan Filice
Cù i so doppii Stavro è Mirvella…
Azzingà vogliu à l’amu u lumbrice
È ciuttà a mio lenza in le to onde…
Sciaccaci puru un morsu s’ella ti dice !
Per ch’e possimu torna currisponde
In prosa imposta o puru in puesia
À sta chjama ch’e lampu degna risponde !
L’allongu troppu, avà ora saria
Di chjode u sughjettu di a pesca,
Vogliu fà prova anch’eiu di curtesia :
Dumandu scusa à Elvira è Francesca,
Serve ùn sò cà di a so passione,
È lodu a so arte fiminesca…
Salut’à tè o carissimu Antone,
Tuttu u foru ti ringrazieghja
Pè i to detti è pè e to canzone!
A Diana d’argentu luccicheghja,
A nostra cara stella matutina
Annant’à i furisti sempre veghja...
Mezzanotte ùn hè ma s’avvicina,
Vogliu dà fine à a mio puesia
Ùn possu scrive sin’à dumatina...
Ma ùn mi scordu di MarcuMaria !
Cù a so rima Matteu Mattei ci face scopre quale sò i furisti...