L'alte gemme di Stefanu Conca

A muntagna sintinella
cum'è un guerrieru feroce
tene a fiera citadella
circundata da e foce.
U turchinu sfrisgia u celu
è risplende in Capitellu.

A furesta cheta è calma
cum'è un forte palancatu
à l'eternu porta l'alma
di 'ssu locu santificatu.
U verde di 'ssu castellu
incatarochja u Melu.

Cum'è un anticu casale
testimoniu di a memoria
questa fonte minerale
ammanta u spechju di Goria.
Invidieghja u Cavacciole
u lume di u vostru sole.

L'immaculata furtezza
sbianca i capi d'ogni pieve
quandu un fioccu di carezza
fascia u so mantellu di neve.
Denduvi cù riccu valore
un ochju d'ogni culore.

A natura misteriosa
in e cime e più alte
cù una manu ingeniosa
ci hà messu tutta a so arte.
Ghjuvelli di qualchì tesoru
d'isse gemme m'innamoru.




Ghjovannu pueta di Marignana,Stefanu Conca hè appassiunatu di cacciamossa è di muntagna.Propiu arradicatu à u so paese,ind'è e so puesie corre un versu anticu,à spessu  vultatu versu a celebrazione di e bellezze di a natura Corsa.A puesia L'alte gemme c'incanta cù l'evucazione di Melu è Capitellu,duie perule surghjente di a Restonica.