Vogliu fà sente a brama Di un zitellu passiunatu Per tene incesa a fiamma Di u focu di l’Antenatu Spergu serà intesa sta chjama Di un figliolu innamuratu. Cun tutti eiu vogliu parlà Di u mio locu, di u paese In lingua nostra chjachjarà Cun u balaninu è u sartinese Cappià parulle senza cuntà Parlà senza fighjà e spese. Cun tutti vogliu impaghjellà Lià e voce in una stonda Per dì ciò ch’era è chì serà In bassu, in terza o in seconda E tutti i versi ammaistrà Cun a ghjente chì ci circonda. Cun tutti vogliu impruvisà E fà ballà a dolce rima Risponde senza mai stancà Cum’è pueti di grande stima. Soga a musa per aiutà Purtà u cantu à l’alta cima. Cun tuttu avà vogliu campà Liberu à e quattru stagioni Ogni purtò pudè francà Girà e pieve è i rughjoni Per chì un ghjornu si pò sperà Paesi pienni da i ritorni. Vogliu fà sente a brama Di un zitellu passiunatu Per mentene sempre a fiamma Di u focu di l’Antenatu Spergu s’hè intesa sta chjama Di un figliolu innamuratu. Ghjuvannu prufessore arradicatu à a so terra di Tavagna,Cristofanu scrive e so canzone,sona di ghitarra ,prova à impaghjellà è cuntrasta cù i più grand'impruvisatori in ogni fiera.Lotta ghjuventù chì l'avvene si tù !! | |