Vita è Avvinturi di u Cavaglieri di Mirvella
Capìtulu VI
A missioni di u Capitanu
Mi chjamu Ghjuvan’ Filici, Capitanu Ghjuvan’ Filici, à u sirviziu di a marina di u nosciu viniràbili Generali Paoli. U più ch’e’ passu tempu hè in i taverni di u molu di Macinaghju, chì ci voli à dilla a noscia pìccula flotta t’hà pocu travaddu. Ùn hè micca cù i dui cannotta chì no t’avemu è i nosci bumbardi rughjinosi di l’èbica ‘lli Sarracini chì no risichemu di vincia a battaglia contru à i Ginuvesi, ma infini, ghje’ à dilla franca mi n’infuttu pocu assà. Circaiu d’essa panaghju cù un mistieri di funziunariu è un cucin’ di terzu chì travadda à a Ghjunta in Corti m’hà prupostu st’ingagiamentu chì m’arreca un bon prufittu è mi teni alluntanatu da u rìsicu : « Surtarè una volta à l’annu cù a to galea è a paga hè bona, è in più t’avarè u pristighju di l’uniformu… » ch’iddu m’hà dittu u me parenti, ed eccu ch’e’ mi socu ritrovu Capitanu di marina. Ma bò, ci hè a noia quantunca…
O piuttostu « c’era » a noia. Chì un bel’ ghjornu so statu cunvucatu à u Palazzu Naziunali da u Generali Paoli. Eru un pocu inchietu. Mi diciu chì cunnaria avaraghju fattu ? O allora si sò avvisti ch’ùn futtiu nudda da a mani à a sera è mi volini fà pagà a me tranchjara… Da veru mi cridiu cottu. À u mìnimu era a rivucazioni, è mi sariu ritrovu à fà u servori mentri a staghjoni in una taverna di Bonifaziu pà dui baiocchi… À u più m’aspittaia a corda di u boia, o u rimbursamentu di tutti i misati incasciati senza futta nudda dipoi un paghju d’anni – iè, a so, parlu com’è un vaccaghju vulgari di u Fiumorbu, ma hè cussì in a marina, semu tutti più o menu zitiddacci – . Ma stavolta ùn la mi pudiu scutta. U Generali mi cunvucaia è à ciò chì paria c’era urgenza, allora mi so ritrovu in una sala d’aspittera à u Palazzu Naziunali, è a ricunnoscu matriculaiu è ùn eru tantu fieru. Mi diciu : sarani à u currenti pà u me tràfficu d’òstrici ? O allora hè l’edizioni rara di i puisii di Guglielmu Guglielmi ch’aghju vindutu à u Turcu, m’ani da dumandà a ristituzioni à nomu di u patrimoniu naziunali… Sudaiu, merè, è in più sintiu i brioni in u scagnu di u Generali è a sapiu chì da quì à pocu tuccaria à mè.
Infini a porta di u scagnu s’hè aparta, è u Generali hè surtitu cù un cunsiglieri intimiditu è russu inciaparatu chì vinia di sèntasili sunà.
− Ùn aghju po’ chè quissa à futta chè di riceva tutti i fiulancia d’Ingliterra è di Scozia !!! briunaia u Generali. T’aghju una guerra à parsegua, eu ! Una dimucrazia à guvarnà ! È m’inviani tutti i tappetti in pirrucca di l’Auropa in circa d’esutismu è di sinsazioni ! Ditili ch’ùn aghju mancu una minuta à cunsacralli, à ‘ssu Boswell !!! È ditili ancu ch’iddu voghi puri à fassi inc…..
Quì u viniràbili Paoli s’avvidisti di a me prisenza, è ùn finisti dunca micca a so frasa.
− Iè ? dissi. Qual’ seti vo, da chì viniti à rùmpami i …. infini voddu dì : vuleti calcosa ? Passu u me tempu à circà d’arranghjà à l’unu è à l’altru ! T’ani tutti calcosa à chera, in ‘ssu paesu ! À chì voli a strada in tarra sinu à u so pasciali, à chì brama un permessu pà custruiscia un rataghju ! Ùn mi ni sortu più, eu !
− Altezza… Socu u Capitanu Ghjuvan’ Filici… di a Marina Naziunali… Seti vo chì m’eti cunvucatu…
− Ah !!! Capitanu… Ùn seti micca troppu impignatu in a Marina ?...... Bò, arristemu di rida, t’aghju un travaddu par vo. Infatti circu un tippu chì t’avissi u tempu lìbaru, pà una missioni longa, è m’ani dittu chì vo erati l’omu di a situazioni… Ma – attinzioni – hè un sicretu di Statu ! Suvitetimi…
Quì aghju suvitatu u Generali, è semu intruti in a citadella. Po’ semu cuddati sin’à l’aculaghja, dund’iddi ci sò i cèdduli di i prighjuneri. Trà mè stessu mi diciu : « m’ani da cuzzà in prighjò, hè una tràppula… » Ma unu sbiru ci hà apartu una porta, è semu intruti tutt’è dui, voddu dì ghje’ è u Generali, insembu in una cèddula. A boci bassa, De’ Paoli m’hà sussuratu à l’arichji : « Spergu chì vo seti un omu tostu, Capitanu, chì u spittàculu à qualissu eti da assista hè guasgi impussìbuli à suppurtà… »
In a cèddula, i me ochja ani missu un tempu à avvizzassi à u bughju. Infini in un cantu, una forma guasgi umana hà cumminciatu à dissignassi. A criatura, sfiuccata è lutinosa, si tinia in cacaglionu, i so ochja scemi lucicaiani in a scurità. Mi dissi chì anzianamenti ‘ssu mostru duvia essa statu un omu. Di colpu, u prighjuneri chjappò una musca à bolu, è l’inguttisti cussì prestu com’iddu avaria fattu calchì bottu. Malgradu u schifizzu, ci avvicinetimu da u malandatu. U Generali pruvò una cuncigliazioni.
− Sgiò Mattei… Mi sintiti ?
Par sola risposta l’ambrascu si missi à briunà, persu è intuntitu :
− Aauuhhh !!!.... U Dimoniu !!!.... Mirvella !!!.... Aauuuhh !!!.... Dolmansuetu !!!.... Aauuhhh !!!... O tamantu !!!.....
Eramu stantarati. Sticchiti di spaventu. I brioni di u disgraziatu erani più moghja d’una bestia in suffrenza chè soni cristiani. Tranquillamenti, u Generali mi bucheti sin’à a surtita, alluntanèndumi da ‘ssa visioni d’orrori. In u mentri chì no surtiamu da a cèddula, u tintu Mattei cumminciò à bulicà di manera frenètica in a so caca. Infini scelsi un beddu strunzu bè puzzinosu, è si mascareti a faccia cù ‘ssa fiorda.
− U tintu… dissi u gran’ Pasquali. L’aghju inviatu in imbasciata in Mirvella, a pievi a più salvàtica, a più scantata è a più insuttimissa di u Regnu… Ed eccu com’iddu hè vultatu… Diu sà chì infernu hà cunnisciutu in ‘ssa contra bàrbara…
Pocu dopu ci semu ritrovi torra à u Palazzu Naziunali, in u scagnu privatu di u Generali. Quì, un omu di ghjesia ci aspittaia ghjà, postu à pusà dipoi un pezzu in unu scornu di a sala, è d’era capicciutatu di nasu in un libronu chì prima mi parsi a bibbia, ma infatti erani i Giustificazioni della Rivoluzione di Corsica, unu spezia di libru senza fini chì trattaia subratuttu di prupaganda. Paoli mi prisinteti l’omu santu.
− Eccu quì à Preti EiuStessu… Prufissori di Ritòrica è di Tiulugia à a noscia università nova. Hè dinò l’Inquisitori in capu di u nosciu Regnu…
U franciscanu si pisò è mi salutò à usu pritinu, calendu u capu com’è ch’iddu avissi à fà una prighera. Po’ mi dumandò :
− Avete vistu cù i vostri ochji l’òpera di u Malignu… Avete vistu à Mattei, u tintu hè statu liccatu da e fiare di Sudoma…
− Iè, o sgiò curà, l’aghju vistu cù i me ochja…
− Ah ! Plurali in « a »… Intarissante… Sapete chì i plurali in « a » di e cuntrate rùstiche è arcàiche di u meziornu falanu diretti da i nèutri latini chì…
Ancu assà u Generali li taddò sùbitu a scicca :
− Più tardi i salamalecchi o sgiò Stessu… Capitanu, eccu a voscia missioni sì vo l’accitteti : eti da parta pà a pievi di Mirvella in cumpagnia di u nosciu inquisitori è d’una scorta di a truppa pagata. È eti da circà di sapè ciò chì succedi culà. T’avareti dinò tutti i càrichi di ghjustizia nicissarii in vista di culpiscia subra piazza i canagli ch’ani abbassatu dipoi un tempu troppu longu l’autorità di a Ghjunta è di u pòpulu.
− Iè, certu, renda a ghjustizia… Ma parchì m’affideti à ‘ssu preti inquisitori ? Ùn semu più à u Medievu po’…
− Ete vistu à Mattei ? intarvensi EiuStessu. T’emu tutti i raghjò di pinsà chì i fatti i più brutti di strigaria sò stati cummissi in Mirvella. È semu risuluti à nità u Regnu d'un’ infamia cumpagna, una vergogna ch’ùn s’era più vistu dipoi o mancu u 1674 è l’affare di e lavandare di Bucugnà !
Ùn sapiu micca di chì affari mi parlaia, ma u so sguardu allucitatu, è à tempu a sprissioni sedia è abitata di u Generali m’insignaiani bè chì a missioni era di a prima impurtanza. Ma quantunca, a me vita di marinaru panaghju era un pocu frasturnata, quì. Risicheti una pìccula prutesta à tutt’ azardu :
− Iè… È s’e’ rifusu a missioni ?
Paoli mi fighjuleti indiffarenti, friscendu è nitèndusi l’ugna cù una lima. Lintò infini :
− U me cunsiglieri parsunali, Preti Valentini, ch’hè dinò amministradori di a bibliuteca di l’università, s’inchiitaia ultimamenti di a sparizioni di l’ùnicu esempiariu di i puisii cumpletti di u nosciu gran’ scrittori naziunali, Guglielmu Guglielmi. Certi agenti di i sirvizii sicreti lacariani intenda cun tràfficu cù un contrabandieri turcu saria statu pussìbuli… Nisciun dùbbitu chì a corda aspittaria d’uffiziu tutti i furdani liati à un tràfficu sìmuli….
È d’eccu, amici littori, comu mi socu ritrovu, malgradu tutta a me vulintà par ischisà ‘ssa tràppula, à cavalcà in muntagna cù Preti EiuStessu è una banda di mercenarii sfacciati di a truppa pagata. Scopu di a noscia spidizioni : a pievi luntana di Mirvella… Vali à dì u Sittèsimu chjirchju di l’infernu…
_________________
A missioni di u Capitanu
Mi chjamu Ghjuvan’ Filici, Capitanu Ghjuvan’ Filici, à u sirviziu di a marina di u nosciu viniràbili Generali Paoli. U più ch’e’ passu tempu hè in i taverni di u molu di Macinaghju, chì ci voli à dilla a noscia pìccula flotta t’hà pocu travaddu. Ùn hè micca cù i dui cannotta chì no t’avemu è i nosci bumbardi rughjinosi di l’èbica ‘lli Sarracini chì no risichemu di vincia a battaglia contru à i Ginuvesi, ma infini, ghje’ à dilla franca mi n’infuttu pocu assà. Circaiu d’essa panaghju cù un mistieri di funziunariu è un cucin’ di terzu chì travadda à a Ghjunta in Corti m’hà prupostu st’ingagiamentu chì m’arreca un bon prufittu è mi teni alluntanatu da u rìsicu : « Surtarè una volta à l’annu cù a to galea è a paga hè bona, è in più t’avarè u pristighju di l’uniformu… » ch’iddu m’hà dittu u me parenti, ed eccu ch’e’ mi socu ritrovu Capitanu di marina. Ma bò, ci hè a noia quantunca…
O piuttostu « c’era » a noia. Chì un bel’ ghjornu so statu cunvucatu à u Palazzu Naziunali da u Generali Paoli. Eru un pocu inchietu. Mi diciu chì cunnaria avaraghju fattu ? O allora si sò avvisti ch’ùn futtiu nudda da a mani à a sera è mi volini fà pagà a me tranchjara… Da veru mi cridiu cottu. À u mìnimu era a rivucazioni, è mi sariu ritrovu à fà u servori mentri a staghjoni in una taverna di Bonifaziu pà dui baiocchi… À u più m’aspittaia a corda di u boia, o u rimbursamentu di tutti i misati incasciati senza futta nudda dipoi un paghju d’anni – iè, a so, parlu com’è un vaccaghju vulgari di u Fiumorbu, ma hè cussì in a marina, semu tutti più o menu zitiddacci – . Ma stavolta ùn la mi pudiu scutta. U Generali mi cunvucaia è à ciò chì paria c’era urgenza, allora mi so ritrovu in una sala d’aspittera à u Palazzu Naziunali, è a ricunnoscu matriculaiu è ùn eru tantu fieru. Mi diciu : sarani à u currenti pà u me tràfficu d’òstrici ? O allora hè l’edizioni rara di i puisii di Guglielmu Guglielmi ch’aghju vindutu à u Turcu, m’ani da dumandà a ristituzioni à nomu di u patrimoniu naziunali… Sudaiu, merè, è in più sintiu i brioni in u scagnu di u Generali è a sapiu chì da quì à pocu tuccaria à mè.
Infini a porta di u scagnu s’hè aparta, è u Generali hè surtitu cù un cunsiglieri intimiditu è russu inciaparatu chì vinia di sèntasili sunà.
− Ùn aghju po’ chè quissa à futta chè di riceva tutti i fiulancia d’Ingliterra è di Scozia !!! briunaia u Generali. T’aghju una guerra à parsegua, eu ! Una dimucrazia à guvarnà ! È m’inviani tutti i tappetti in pirrucca di l’Auropa in circa d’esutismu è di sinsazioni ! Ditili ch’ùn aghju mancu una minuta à cunsacralli, à ‘ssu Boswell !!! È ditili ancu ch’iddu voghi puri à fassi inc…..
Quì u viniràbili Paoli s’avvidisti di a me prisenza, è ùn finisti dunca micca a so frasa.
− Iè ? dissi. Qual’ seti vo, da chì viniti à rùmpami i …. infini voddu dì : vuleti calcosa ? Passu u me tempu à circà d’arranghjà à l’unu è à l’altru ! T’ani tutti calcosa à chera, in ‘ssu paesu ! À chì voli a strada in tarra sinu à u so pasciali, à chì brama un permessu pà custruiscia un rataghju ! Ùn mi ni sortu più, eu !
− Altezza… Socu u Capitanu Ghjuvan’ Filici… di a Marina Naziunali… Seti vo chì m’eti cunvucatu…
− Ah !!! Capitanu… Ùn seti micca troppu impignatu in a Marina ?...... Bò, arristemu di rida, t’aghju un travaddu par vo. Infatti circu un tippu chì t’avissi u tempu lìbaru, pà una missioni longa, è m’ani dittu chì vo erati l’omu di a situazioni… Ma – attinzioni – hè un sicretu di Statu ! Suvitetimi…
Quì aghju suvitatu u Generali, è semu intruti in a citadella. Po’ semu cuddati sin’à l’aculaghja, dund’iddi ci sò i cèdduli di i prighjuneri. Trà mè stessu mi diciu : « m’ani da cuzzà in prighjò, hè una tràppula… » Ma unu sbiru ci hà apartu una porta, è semu intruti tutt’è dui, voddu dì ghje’ è u Generali, insembu in una cèddula. A boci bassa, De’ Paoli m’hà sussuratu à l’arichji : « Spergu chì vo seti un omu tostu, Capitanu, chì u spittàculu à qualissu eti da assista hè guasgi impussìbuli à suppurtà… »
In a cèddula, i me ochja ani missu un tempu à avvizzassi à u bughju. Infini in un cantu, una forma guasgi umana hà cumminciatu à dissignassi. A criatura, sfiuccata è lutinosa, si tinia in cacaglionu, i so ochja scemi lucicaiani in a scurità. Mi dissi chì anzianamenti ‘ssu mostru duvia essa statu un omu. Di colpu, u prighjuneri chjappò una musca à bolu, è l’inguttisti cussì prestu com’iddu avaria fattu calchì bottu. Malgradu u schifizzu, ci avvicinetimu da u malandatu. U Generali pruvò una cuncigliazioni.
− Sgiò Mattei… Mi sintiti ?
Par sola risposta l’ambrascu si missi à briunà, persu è intuntitu :
− Aauuhhh !!!.... U Dimoniu !!!.... Mirvella !!!.... Aauuuhh !!!.... Dolmansuetu !!!.... Aauuhhh !!!... O tamantu !!!.....
Eramu stantarati. Sticchiti di spaventu. I brioni di u disgraziatu erani più moghja d’una bestia in suffrenza chè soni cristiani. Tranquillamenti, u Generali mi bucheti sin’à a surtita, alluntanèndumi da ‘ssa visioni d’orrori. In u mentri chì no surtiamu da a cèddula, u tintu Mattei cumminciò à bulicà di manera frenètica in a so caca. Infini scelsi un beddu strunzu bè puzzinosu, è si mascareti a faccia cù ‘ssa fiorda.
− U tintu… dissi u gran’ Pasquali. L’aghju inviatu in imbasciata in Mirvella, a pievi a più salvàtica, a più scantata è a più insuttimissa di u Regnu… Ed eccu com’iddu hè vultatu… Diu sà chì infernu hà cunnisciutu in ‘ssa contra bàrbara…
Pocu dopu ci semu ritrovi torra à u Palazzu Naziunali, in u scagnu privatu di u Generali. Quì, un omu di ghjesia ci aspittaia ghjà, postu à pusà dipoi un pezzu in unu scornu di a sala, è d’era capicciutatu di nasu in un libronu chì prima mi parsi a bibbia, ma infatti erani i Giustificazioni della Rivoluzione di Corsica, unu spezia di libru senza fini chì trattaia subratuttu di prupaganda. Paoli mi prisinteti l’omu santu.
− Eccu quì à Preti EiuStessu… Prufissori di Ritòrica è di Tiulugia à a noscia università nova. Hè dinò l’Inquisitori in capu di u nosciu Regnu…
U franciscanu si pisò è mi salutò à usu pritinu, calendu u capu com’è ch’iddu avissi à fà una prighera. Po’ mi dumandò :
− Avete vistu cù i vostri ochji l’òpera di u Malignu… Avete vistu à Mattei, u tintu hè statu liccatu da e fiare di Sudoma…
− Iè, o sgiò curà, l’aghju vistu cù i me ochja…
− Ah ! Plurali in « a »… Intarissante… Sapete chì i plurali in « a » di e cuntrate rùstiche è arcàiche di u meziornu falanu diretti da i nèutri latini chì…
Ancu assà u Generali li taddò sùbitu a scicca :
− Più tardi i salamalecchi o sgiò Stessu… Capitanu, eccu a voscia missioni sì vo l’accitteti : eti da parta pà a pievi di Mirvella in cumpagnia di u nosciu inquisitori è d’una scorta di a truppa pagata. È eti da circà di sapè ciò chì succedi culà. T’avareti dinò tutti i càrichi di ghjustizia nicissarii in vista di culpiscia subra piazza i canagli ch’ani abbassatu dipoi un tempu troppu longu l’autorità di a Ghjunta è di u pòpulu.
− Iè, certu, renda a ghjustizia… Ma parchì m’affideti à ‘ssu preti inquisitori ? Ùn semu più à u Medievu po’…
− Ete vistu à Mattei ? intarvensi EiuStessu. T’emu tutti i raghjò di pinsà chì i fatti i più brutti di strigaria sò stati cummissi in Mirvella. È semu risuluti à nità u Regnu d'un’ infamia cumpagna, una vergogna ch’ùn s’era più vistu dipoi o mancu u 1674 è l’affare di e lavandare di Bucugnà !
Ùn sapiu micca di chì affari mi parlaia, ma u so sguardu allucitatu, è à tempu a sprissioni sedia è abitata di u Generali m’insignaiani bè chì a missioni era di a prima impurtanza. Ma quantunca, a me vita di marinaru panaghju era un pocu frasturnata, quì. Risicheti una pìccula prutesta à tutt’ azardu :
− Iè… È s’e’ rifusu a missioni ?
Paoli mi fighjuleti indiffarenti, friscendu è nitèndusi l’ugna cù una lima. Lintò infini :
− U me cunsiglieri parsunali, Preti Valentini, ch’hè dinò amministradori di a bibliuteca di l’università, s’inchiitaia ultimamenti di a sparizioni di l’ùnicu esempiariu di i puisii cumpletti di u nosciu gran’ scrittori naziunali, Guglielmu Guglielmi. Certi agenti di i sirvizii sicreti lacariani intenda cun tràfficu cù un contrabandieri turcu saria statu pussìbuli… Nisciun dùbbitu chì a corda aspittaria d’uffiziu tutti i furdani liati à un tràfficu sìmuli….
È d’eccu, amici littori, comu mi socu ritrovu, malgradu tutta a me vulintà par ischisà ‘ssa tràppula, à cavalcà in muntagna cù Preti EiuStessu è una banda di mercenarii sfacciati di a truppa pagata. Scopu di a noscia spidizioni : a pievi luntana di Mirvella… Vali à dì u Sittèsimu chjirchju di l’infernu…
_________________